കണ്ടെയിന്‍മെന്‍റ് സോണുകളില്‍ നിര്‍മാണ പ്രവര്‍ത്തനങ്ങള്‍ നടത്തുന്നതിന് തടസ്സമില്ലെന്ന് മുഖ്യമന്ത്രി പിണറായി വിജയൻ. നിര്‍മാണ സാമഗ്രികള്‍ വില്‍ക്കുന്ന കടകള്‍ക്കും പ്രവര്‍ത്തനാനുമതി നല്‍കി.
ലോക്ക്ഡൗണ്‍ സമയത്ത് ജീവന്‍രക്ഷാ മരുന്നുകള്‍ വിവിധ സ്ഥലങ്ങളില്‍ നിന്ന് ശേഖരിച്ച് നല്‍കുന്നതിന് പൊലീസ് ഏര്‍പ്പെടുത്തിയ സംവിധാനം വിജയകരമായി മുന്നോട്ടുപോകുന്നുണ്ടെന്ന് മുഖ്യമന്ത്രി പറഞ്ഞു. ഹൈവേ അലര്‍ട്ട് സെല്ലിന്‍റെ നിയന്ത്രണത്തിലാണ് ജില്ലയില്‍ നിന്ന് മറ്റു ജില്ലയിലേക്ക് മരുന്ന് എത്തിക്കുന്നത്. രണ്ടാം ഘട്ടത്തില്‍ പദ്ധതിയിലൂടെ 910 പേര്‍ക്ക് മരുന്ന് എത്തിച്ചു നൽകാൻ സാധിച്ചതായും അദ്ദേഹം പറഞ്ഞു.
കൊവിഡ് ബാധിച്ച് വീടുകളില്‍ കഴിയുന്നവര്‍ പുറത്ത് പോകാതെ നോക്കാൻ നിരീക്ഷണം ശക്തിപ്പെടുത്തിയിട്ടുണ്ട്. ഇവർ വീടുകളില്‍ തന്നെ ഉണ്ടോയെന്ന് ഉറപ്പാക്കുന്നതിനായി ഫോണ്‍ ചെയ്ത് വിവരം അന്വേഷിക്കുന്ന സംവിധാനം നടപ്പാക്കാന്‍ പൊലീസിന് നിര്‍ദ്ദേശം നല്‍കിയതായും മുഖ്യമന്ത്രി അറിയിച്ചു.
