അബൂദബി അന്താരാഷ്ട്ര വിമാനത്താവളത്തിന് രാഷ്ട്രപിതാവ് ശൈഖ് സായിദ് ബിൻ സുൽത്താൻ ആൽ നഹ്യാന്‍റെ പേര്. സായിദ് അന്താരാഷ്ട്ര വിമാനത്താവളം എന്ന പുതിയ നാമം അടുത്തവർഷം ഫെബ്രുവരി ഒമ്പത് മുതല്‍ നിലവില്‍ വരുമെന്ന് അബൂദബി മീഡിയാ ഓഫിസ് അറിയിച്ചു.
യു.എ.ഇ പ്രസിഡന്റ് ശൈഖ് മുഹമ്മദ് ബിൻ സായിദ് ആൽ നഹ്യാനാണ് പുനര്‍നാമകരണത്തിന് ഉത്തരവിട്ടത്. ബുധനാഴ്ച മുതല്‍ വിമാനത്താവളത്തിൽ പുതുതായി നിർമാണം പൂർത്തിയാക്കിയ ടെര്‍മിനല്‍-എ പ്രവര്‍ത്തനം തുടങ്ങാനിരിക്കെയാണ് വിമാനത്താവളത്തിന്റെ പേരുമാറ്റം സംബന്ധിച്ച തീരുമാനമെടുത്തത്.
