ഒമാനിൽ അടുത്ത മൂന്ന് ദിവസങ്ങളിലായി താപനിലയിൽ ക്രമാനുഗതമായ വർധനവുണ്ടാകുമെന്നും 45 ഡിഗ്രി സെൽഷ്യസിൽ വരെ എത്താൻ സാധ്യതയുണ്ടെന്നും ഒമാൻ കാലാവസ്ഥാ നിരീക്ഷണകേന്ദ്രം ചൊവ്വാഴ്ച അറിയിച്ചു. താപനിലയിൽ ഘട്ടംഘട്ടമായ വർധനവാണ് പ്രതീക്ഷിക്കുന്നത്.
മരുഭൂമി പ്രദേശങ്ങളിലായിരിക്കും ഏറ്റവും കൂടുതൽ ചൂട് അനുഭവപ്പെടുക. ഒമാൻ കടലിന്റെ തീരപ്രദേശങ്ങളിലും ഹജർ പർവതനിരകളുടെ ഭാഗങ്ങളിലുമാണ് 40 ഡിഗ്രിയിൽ കൂടുതൽ താപനിലയെത്തുകയെന്നും നിരീക്ഷണകേന്ദ്രം പ്രസ്താവനയിൽ പറഞ്ഞു.
